УИХ-ын гишүүн Ж.Сүхбаатар нар Нийслэлийн Иргэдийн Төлөөлөгчдийн Хурлын сонгуулийн тухай хуулийн төслийг Засгийн газрын ээлжит бус хуралдаанаар хэлэлцлээ. Төслийг зарчмын хувьд дэмжиж, Орон нутгийн хурлын сонгуулийн тухай хуульд нэмэлт, өөрчлөлт оруулах тухай хуулийн төслийг боловсруулах шаардлагатай хэмээн хууль санаачлагч нарт уламжлахаар боллоо.
Нэр бүхий гишүүд хуулийн төсөлдөө нэрийн нэг жагсаалтын эхний 30-аас илүүгүй нэр дэвшигчийг сонгуулийн тойргоос, 15-аас илүүгүй нэр дэвшигчийг улс төрийн нам буюу намуудын сонгуулийн эвслийн жагсаалтаас тус тус сонгохоор тусгажээ. Мөн Нийслэлийн Иргэдийн Төлөөлөгчдийн Хурлын сонгуульд нам, эвслээс нэр дэвшиж байгаа хүний 20-иос доошгүй хувь нь эмэгтэйчүүдийн төлөөлөл байх, сонгуульд мөнгө амлахыг хориглох зэрэг олон асуудлыг зохицуулахаар тусгасан байна.
