Монгол Улсын ерөнхий сайд С.Батболд MИАТ ХК-ийн үйл ажиллагаатай холбогдон үүссэн нөхцөл байдалтай шуурхай танилцаад уг асуудлыг Засгийн газрын хуралдаанаар хэлэлцүүлэх шийдвэр өчигдөр орой гаргасан. Энэ дагуу өнөөдөр Засгийн газрын ээлжит хуралдаан дээр МИАТ ХК дээр үүссэн нөхцөл байдлын талаар ЗТБХБ-ын сайд Х.Баттулга танилцуулга хийлээ. МИАТ ХК-ийн Техникийн газрын инженер техникийн хэсэг ажилтнууд 2010 оны 05 дугаар сарын 25-ны өдрийн өглөөний 06.45 цагт нисэх ёстой байсан Улаанбаатар-Сөүлийн чиглэлийн Боинг 737-800 онгоцыг нислэгт гаргалгүй саатуулснаас энэ нислэгийг болон оройн 18.00 цагт нисэх Улаанбаатар-Бээжин чиглэлийн нислэг хойшлуулахад хүрсэн байна.
Нислэг саатсанаар 1141 зорчигчийг тээвэрлэх боломжгүй болж,урьдчилсан байдлаар 384.8 сая төгрөгийн хохирол учирчээ. Үүссэн нөхцөл байдлыг Засгийн газар шуурхай анхааралдаа авч нислэгийн үйл ажиллагааг хэвийн үргэлжлүүлэх талаар тодорхой арга хэмжээнүүдийг авч байна. Засгийн газар МИАТ ХК-тай холбоотой асуудлыг 2 дах удаагаа авч хэлэлцэж байна. Хүний амь нас, аюулгүй байдлыг найдвартай хангах ёстой хамгийн эмзэг салбарт ийм хариуцлагагүй байдал гарч байгаа нь онцгой нөхцөл байдал гэж үзэх ёстой.
Тиймээс онгоцны аюулгүй байдлын үүднээс хэвийн болтол нислэгийг зогсоох , энэ хугацаанд гадны авиа компанитай гэрээ хэлэлцээний дагуу найдвартай онгоц түрээслэж хуваарьт нислэгийг хэвийн үргэлжлүүлэх шийдвэрийг Засгийн газрын хуралдаанаас гаргалаа. Мөн ТӨХ-г ээлжит бус хурлаа яаралтай хуралдуулж МИАТ ХК-ийн ТУЗ-ийг баталж оруулж ирэх , оройн 17 цаг гэхэд МИАТ-ын удирдлага,ТУЗ-ийг бүхэлд нь өөрчлөх асуудлыг тэр даруйд нь Засгийн газарт танилцуулахыг ЗТБХБ-ын сайд Х.Баттулга болон ТӨХ-ны дарга Д.Сугар нарт Ерөнхий сайд С.Батболд даалгалаа. МИАТ ХК-д гадны менежментийн багийг хуулийн дагуу оруулж иртэл мэргэжлийн чадвартай хариуцлагатай үүрэг гүйцэтгэгчийг томилох саналаа 17 цагт хамтад нь оруулж ирэхийг хуралдаанаас дээрх хүмүүст үүрэг болголоо.
