~ Засгийн газрын ээлжит бус хуралдаан 2012 оны 02 дугаар сарын 07-ны өдөр болов ~

Хуралдаанаар Монгол Улсын 2012 оны төсвийн тухай хуульд нэмэлт, өөрчлөлт оруулах тухай, Нийгмийн даатгалын сангийн 2012 оны төсвийн тухай хуульд өөрчлөлт оруулах тухай, тэдгээртэй холбогдуулан Төсвийн тухай хуульд өөрчлөлт оруулах тухай хуулийн болон УИХ-ын 2011 оны 54, 55 дугаар тогтоолд өөрчлөлт оруулах тухай тогтоолын төслийг хэлэлцсэн байна. Үүнтэй холбогдуулан Засгийн газрын гишүүдээс гаргасан саналыг тусган УИХ-аар нэн яаралтай хэлэлцүүлэхээр боллоо. Засгийн газрын хуралдааны дараа Сангийн сайд Д.Хаянхярваа хуулиудын төслийг УИХ-ын дарга Д.Дэмбэрэлд өргөн барьсан байна.

Төсвийн тодотгол хийхдээ энэ оны төсвийн урьдчилсан гүйцэтгэлд үндэслэн төсвийн орлогын эх үүсвэрийг бүрэн дайчлах, төсвийн байгууллагын албан хаагчдын цалин, Нийгмийн даатгалын болон Нийгмийн халамжийн сангаас олгох тэтгэвэр, зарим тэтгэмжийг үе шаттай нэмэх хугацааг наашлуулах, Засгийн газрын бүрэлдэхүүний тухай хуулийн зарим заалтыг хүчингүй болсонд тооцох тухай хуулийн хэрэгжилтийг хангах зарчим  баримталжээ. Засгийн газар цалин, тэтгэвэр, зарим тэтгэмжийг нэмэх талаар гурван удаа хэлэлцсэн. Төсөвт тодотгол хийх замаар асуудлыг шийдье гэдэгт УИХ дахь намын бүлгүүд тохиролцсоны дагуу дээрх шийдвэрийг гаргав гэж Засгийн газрын Хэвлэл, мэдээллийн албанаас мэдээллээ.