Монгол Улсын Засгийн газрын Жендэрийн Үндэсний хороо Нэгдсэн Үндэстний Байгууллагын Хөгжлийн хөтөлбөртэй хамтран Ази тивийн эмэгтэйчүүдийн улс төрийн оролцоог нэмэгдүүлэх үндэсний стратегийг тодорхойлох зорилгоор “Эмэгтэйчүүдийн улс төрийн оролцоог нэмэгдүүлэх арга замыг тодорхойлох нь”сэдэвт Азийн бүсийн бага хурлыг зохион байгуулж байна. Улаанбаатар хотноо өнөөдөр эхэлсэн энэхүү хурал хоёр өдөр үргэлжлэх бөгөөд Зүүн умард болон Зүүн өмнөд Азийн орнууд БНХАУ, Вьетнам, Индонез, Камбож, Киргиз, Малайз, Монгол, Мянмар, Филиппин, Тайланд, БНА Тимор Лесте зэрэг 11 орны парламентийн гишүүд, Засгийн газар, иргэний нийгмийн төлөөлөл, НҮБ-ын Хөгжлийн хөтөлбөрийн ажилтнууд, экспертүүдийн 80 гаруй төлөөлөгч оролцож байгаа юм.
Монгол Улсад сүүлийн жилүүдэд гарч байгаа эдийн засгийн өсөлтийг бодит хөгжил болгож, тогтвортой, ногоон өсөлт болгох, иргэн бүрийг эрүүл, боловсролтой, ажилтай, орлоготой, сэтгэл хангалуун амьдрах нөхцөлийг бий болгоход зориулах учиртай. Өөрөөр хэлбэл, бид хүний хөгжилд илүү их анхаарал хандуулах шаардлагатай байна. Үүнийг хэрэгжүүлэх арга замын нэг нь нийгэм, эдийн засаг, улстөрийн бүхий л салбарт жендэрийн тэгш байдлыг хангах явдал юм гэж Монгол Улсын Ерөнхий сайд, Жендэрийн үндэсний хорооны дарга С.Батболд хуралд оролцогчдод явуулсан илгээлтдээ тодотгосон байна. Бүрэн дунд боловсролын сургуульд суралцагчдын эрэгтэй эмэгтэй хүүхдийн тооны харьцаа, Хөдөө аж ахуйгаас бусад салбарт цалинтай ажил эрхэлж байгаа хүн амын жендэрийн тэгш байдлыг хангах зэрэг үзүүлэлтийг Монгол Улс аль хэдийнэ хангаад байгааг Ерөнхий сайд тэмдэглэжээ.
Гэвч улс төрд, шийдвэр гаргах түвшинд эмэгтэйчүүдийн оролцоог нэмэгдүүлэх зорилтын хувьд удаашралтай буюу ухралттай байгааг дурьдаад жендэрийн тэгш байдлыг хангах, эмэгтэйчүүдэд хандсан бодлогыг хууль эрхзүйн баталгаатай болгоход Монгол Улсын Засгийн газраас ихээхэн анхаарч, цогц бодлого, арга механизм нэвтрүүлж байна. Үүний дотор Монгол Улсын Засгийн газраас санаачилсан Жендэрийн эрх тэгш байдлыг хангах тухай хуулийг өнгөрсөн онд УИХ-аар баталсан бөгөөд Сонгуулийн тухай хуульд эмэгтэйчүүдийн квотыг тусган түүний тэргүүлсэн Засгийн газрын үед анх удаа хэрэгжүүлэх гэж байгааг Ерөнхий сайд С.Батболд тэмдэглэлээ. Цаашдаа эмэгтэйчүүдийн нөөц бололцоог улс төрийн хувьд бүрэн дүүрэн ашиглах, ардчилсан засаглалд бодитойгоор оролцох боломжийг олгохын төлөө улам эрчимтэй ажиллах болно гэдгээ ч Засгийн газрын тэргүүн илэрхийлжээ.
Түүнчлэн тэрбээр илгээлтдээ жендэрийн тэгш байдлыг хангах тухай Мянганы хөгжлийн зорилт Зүүн Азийн бүс нутгийн орнуудад харилцан адилгүй хэрэгжиж байгаа нь энэхүү олон улсын бага хурлын ач холбогдлыг нэмэгдүүлж байна. Бид бүхэн нэгэн тивд оршин амьдарч байгаа ч хөгжлийн хувьд харилцан адилгүй, жендэрийн талаар олсон ололт амжилт өөр өөр байна. Тиймээс энэ хурлын үеэр улс орон бүр Мянганы хөгжлийн зорилтуудаа биелүүлэх, учрах сорилт бэрхшээлийг даван туулах шийдлээ олж, сайн туршлагаа хуваалцан ярилцаж анхаарна гэдэгт итгэлтэй байгаа гэжээ.
Дэлхийн олон орны элч төлөөлөгч болж ирсэн эдгээр төлөөлөгч сонгуульд өрсөлдөх эмэгтэйчүүдэд хэрхэн дэмжлэг үзүүлэх вэ, эмэгтэйчүүдийг улс төрд татан оролцуулах ямар арга зам байна, төрийн захиргаан дахь жендэрийн тэгш байдал, эмэгтэйчүүдийн эрхийг нэмэгдүүлэх асуудал, эмэгтэйчүүдийн улс төрийн оролцоог дэмжихэд орон орны авч буй эрх зүй, тогтолцоо зэрэг олон сэдвийг хөндөж хэлэлцүүлэг өрнүүлэн, туршлага мэдээллээсээ хуваалцаж байна.
Улс төрийн оролцоон дахь жендэрийн тэгш байдлыг хангах нь ардчилал, нийгмийн шударга ёсны үндэс. Энэхүү шударга ёсыг бэхжүүлэхийн төлөө улс орнууд хэлэлцэн Мянганы тунхаглалыг баталж Засгийн газрууд үүний төлөө тусгай арга хэмжээ авахаар амлалт өгсөн. Иймээс олон улсын түвшинд тавьсан үүрэг амлалтаа бодит ажил болгохын төлөө Азийн орнууд хуран чуулж туршлагаа солилцон, туршлагад үндэслэн улс төр дэх эмэгтэйчүүдийн үүргийг нэмэгдүүлэх үндэсний стратегийг боловсруулах, бүс нутгийн түвшинд мэдээлэл солилцох, хамтран ажиллах, өөрчлөлт шинэчлэлийн талаар нөлөөллийн ажил хийхэд бүсийн орнууд бие биедээ туслах нь хурлын зорилго юм гэж Засгийн газрын Хэвлэл мэдээллийн албанаас мэдээллээ.
