Монгол Улсын Ерөнхий сайд С.Батболд Хотгойдын их жанжин Чингүнжавын мэндэлсний 300 жилийн ойн баярын арга хэмжээнд оролцсоныхоо дараа Увс аймгийг зорилоо. Тэрээр 2010 оны долдугаар сарын 29-ний өдөр Хөвсгөл аймгийн Цэцэрлэг сумын нутаг, Тэсийн голын гүүр орчим түр буудаллахдаа тус сумын малчидтай уулзаж ярилцав.
Цэцэрлэг сумынхан өвлийн цас зуданд нэлээд зутарч 360 гаруй өрх огт малгүй болж хотоо харлуулжээ. Азийн хөгжлийн банк, олон улсын байгууллагаас хэрэгжүүлж байгаа төсөл, Улсын төсвийн санхүүжилтээр малгүй болсон иргэдэд төрөөс 300 мянган төгрөгийн буцалтгүй тусламж үзүүлж байгаа.Малчид энэ мөнгөөр саалийн үнээ, хурга, ишигтэй хонь, ямаа худалдан авч зуны дэлгэр цагт хар цай уулгүй зусч байна. Хэдий зутруу өвөлжсөн ч орон нутагт зуншлага сайхан байгаа учир малчдын сэтгэл тэнийж, амин зуулгын хэдэн малаа тарга тэвээрэг авахуулан өсгөхийг хичээж, хадлан тэжээлээ ч базааж эхэлжээ.
Цэцэрлэг сум алслагдсан, өвөл цас их унаж хүйтэрдэг, жижиг дунд үйлдвэрлэл хөгжөөгүй учир ажлын байр хомс, үүнийгээ дагаад иргэдийн амьжиргаа ч тааруухан харагдана. Могойн голын усан цахилгаан станц ашиглалтад орвол байдал өөрчлөгдөж, олон хүн ажилтай болох учир барилгын ажлыг шуурхайлахад анхаарахыг малчид Ерөнхий сайдаас аминчлан хүсч байлаа. Малчид мал, махаа өндөр үнээр зарж борлуулдаг гэж яригддаг ч үнэндээ ченжүүд үнийг хөөрөгддөг. Тэд нэг кг махыг 800 хүрэхгүй төгрөгөөр малчдаас авч нийслэл, төв суурин газарт 7000 төгрөг хүргэн хэд дахин их ашиг олж байна. Иймээс олон шат дамжлаггүйгээр бүтээгдэхүүнээ хэрэглэгчдэд шууд хүргэдэг тогтолцоо бүрдүүлэх хэрэгтэй гэж олон малчид ярьж байв.
Ерөнхий сайд С.Батболд хэлэхдээ “Малчдынхаа талаар Засгийн газар онцгой анхаарч ирсэн. Цаашид ч анхаарах болно. Энэ өвөл гэхэд Засгийн газрын нөөц хөрөнгийн тал хувийг малчдадаа туслах, тусламж хүргэхэд зарцууллаа. “Монгол мал” хөтөлбөрийн хүрээнд аймаг болгонд зээл олгож махны үйлдвэр байгуулна. Энэ үйлдвэрийн эзэд нь малчид та бүхэн. Төр бүх зүйлд ороод байх ёсгүй, харин ажиллах эрх зүйн орчныг нь л бүрдүүлж өгөх үүрэгтэй. Малчид үйлдвэртээ малаа тушааж, үйлдвэрийн аргаар махаа бэлтгэн төв суурин газруудын хэрэгцээг ханга. Мөн махны бирж байгуулна. Ингэснээр мал, малын гаралтай бүтээгдэхүүн ченжийн гар дамжихгүй болж, үнийн хөөрөгдөл ч арилна” хэмээн тэмдэглэн хэлж байсан.
Малчид хоршоо, нөхөрлөл хэлбэрээр хамтарч, хүчээ нэгтгэн ажиллах сонирхолтой ч хамгийн гол нь зохион байгуулалт дутагдаж байна. Үүнийг төр засаг, орон нутаг, сум зохицуулж өгөхийг хүслээ. Энэ жил Цэцэрлэг суманд газрын гарц сайн байгаа учир хадлан, тэжээлээ сайн бэлтгэж ирэх өвлийг ажралгүй давна гэдгээ Ерөнхий сайдад тэд амлалаа. Малчидтай уулзсаны дараа Ерөнхий сайд С.Батболд Увс аймгийг зорилоо. Тэрээр тус аймгийн “Увс хүнс” компаниар орж чацарганы талбай, үрийн аж ахуйтай танилцана. Мөн Улаангом хотод шинээр тавьсан замын нээлтэд оролцон аймгийн иргэдтэй уулзах юм.
