Мөн Боом өвчний голомтод ажиллаж, тэнд ариутгал халдваргүйтэл хийж байгаа хүмүүсийн эрүүл мэнд, боом өвчний халдвар авахаас урьдчилан сэргийлэх, малын арьс шир худалдаалдаг цэгүүдэд хатуу хяналт тавьж ажиллахыг Улсын онцгой комиссын гишүүдэд анхаарууллаа. Мөн Сэлэнгэ  аймгийн Засаг даргын захирамжаар тус аймагт энэ сарын 05-нд тогтоосон хорио цээрийн дэглэм цуцлагдсан ч халдварыг бүрэн зогсоож, голомтыг устгах, дахин гаргахгүй байхад анхаарч ажиллахыг Шадар сайд гишүүддээ үүрэг болгосон юм.

Гол төлөв үжил хэлбэрээр гардаг, байгалийн голомтод хурц халдварт боомоор өвчилсөн болон үхсэн малын махыг хүнсэнд хэрэглэх, арьс шир, үс ноос зэрэг түүхий эдийг нь авч ашиглах, голомт бүхий газрыг ухах, худаг ус гаргах зэргээр хүмүүс боомын халдвар авдаг талаар мэргэжлийн хүмүүс зөвлөгөө өгч байна. Сэлэнгэ аймгийн Зүүнбүрэн, Шаамар сумын хоёр айлын гурван үхэр тодорхой бус шалтгаанаар өнгөрсөн сарын сүүлчээр хорогдсон. Эдгээр үхрийн сэг зэмд шинжилгээ хийхэд боом өвчнөөр өвчилсөн байсан нь тогтоодсон юм. Дээрх хугацаанаас хойш голомтын болон сэжигтэй бүсэд 12 үхэр, 7 адуу, 2 хонь, нэг ямаа нийт 22 мал хорогдсон гэсэн мэдээллийг Мал эмнэлгийн үржлийн газрын дарга хийлээ.

2010 оны эхний хагас жилийн байдлаар Хөвсгөл аймгийн Алаг-Эрдэнэ, сэлэнгэ аймгийн Зүүнбүрэн сумын нутагт 42 мал боомоор өвчилж улмаар малын түүхий эд бүтээгдэхүүнээс дамжин 24 хүн энэ өвчний халдвар авчээ. Голомт бүхий нутгийн мал бүргийг боом өвчнөөс сэргийлэх тарилгад 3,1 сая малыг хамруулахаар төлөвлөн шаардагдах вакциныг 22 аймаг, нийслэлийн мал эмнэлгийн албанд хүргүүлжээ. Одоогоор улсын нөөцөд 88 мянган үхрийг энэхүү өвчнөөс сэргийлэх, 20 мянган малыг эмчлэхэд хүрэлцэхүйц вакцин, ийлдэс байгаа юм байна гэж Засгийн газрын Хэвлэл мэдээллийн албанаас мэдээллээ.