Монгол улсын төсвийн тогтвортой байдал сайжирсан, инфляци буурсан, үндэсний мөнгөн хадгаламжийн хэмжээ өссөн зэрэг макро эдийн засгийн тогтвортой байдлын үзүүлэлтүүд 4.9 ( өнгөрсөн онд 3.9 байсан) болж эрс дээшилсэн нь манай улсын өрсөлдөх чадварын үзүүлэлтийг сайжруулахад голлон нөлөөлсөн байна. Өөрөөр хэлбэл 2008-2009 оны дэлхийн эдийн засгийн хямралыг амжилттай даван туулж, макро эдийн засгийн тогтвортой байдлыг хангаж чаджээ. 

Харин бизнесийн байгуулагуудын зээл авах нөхцөл хүнд, арилжааны банкны найдвартай үйл ажиллагааны болон үнэт цаасны зохицуулалтын байдлын үзүүлэлт, бизнесийг дэмжих санхүүжилтын олон янз хэлбэр үүсээгүй зэргээс хамаарсан санхүүгийн зах зээлийн боловсронгуй байдлын үзүүлэлт өнгөрсөн оны 3.4 онооноос буурч 3.1 болж, 115 дугаар байрнаас ухарч 129 дүгээр байрт оржээ.

Иймээс цаашид хөрөнгийн зах зээл, хөрөнгийн биржийн үйл ажиллагааг тууштай шинэчлэх, Хөгжлийн банк байгуулан эдийн засагт орох хөрөнгийн урсгалыг нэмэгдүүлэх, арилжааны банкуудаас бизнест олгодог зээлийн нөхцөл, олдоцыг сайжруулах ажлыг үргэлжлүүлэн хэрэгжүүлэх шаардлага байгааг уг тайланд дурдсан байна. Мөн түүнчлэн энэ тайланд анх удаа мэргэшсэн ажиллах хүчний дутагдал, ажиллах хүчний ёс зүйн байдлын үзүүлэлт бизнес эрхлэх болон Монгол улсын өрсөлдөх чадварт сөргөөр нөлөөлж буйг онцолжээ.

Дэлхийн эдийн засгийн форумаас жил бүр дэлхий дахины өрсөлдөх чадварын тайланг гаргадаг бөгөөд 2010-2011 оны өрсөлдөх чадварын тайлан энэ долоо хоногт ийнхүү гарсан нь энэ юм. Дэлхийн эдийн засгийн форумаас эрхлэн гаргадаг өрсөлдөх чадварын индекс нь олон улсад хүлээн зөвшөөрөгдсөн зэрэглэл бөгөөд Монгол улсын өрсөлдөх чадварыг ижил төстэй улс орнуудтай харьцуулах боломж олгохын зэрэгцээ тухайн улсын өрсөлдөх чадварын өсөлт, бууралт, тогтмол байдлын талаарх мэдээллийг өгдөг ажээ. гэж Засгийн газрын хэвлэл, мэдээллийн албанаас мэдээллээ.