Онцгой байдлын албан хаагчид  ард иргэдийнхээ тайван, аюулгүй орчинд амьдрах бололцоог хангах үүднээс аливаа гамшгийн аюулаас урьдчилан сэргийлэхэд цаг наргүй ажилладаг ч  өнөөгийн шаардлагад нийцсэн  тоног төхөөрөмж,  багаж хэрэгслээр дутмаг байдаг.

Монгол Улсын Шадар  сайд Д.Тэрбишдагва  тэдний ажиллах нөхцөлийг  сайжруулж, албан үүргээ хэвийн явуулах  боломжийг хангах үүднээс төсвийн хөрөнгө оруулалтаар  худалдан авсан техник, хэрэгслийг Булган, Ховд, Увс, Архангай зэрэг долоон аймагт, БНСУ-ын хандив тусламжаар өгсөн бага оврын гал унтраах машиныг Дорноговь аймгийн Аврах гал унтраах  ангид  өнөөдөр хүлээлгэн өглөө.

 

Түлхүүр гардуулах үеэр Шадар сайд “Аврагч, гал сөнөөгчид амь насаараа дэнчин тавьж бусдын амь нас, эд хөрөнгийг авран  хамгаалах үүрэг, өргөсөн  тангарагтаа эзэн нь болж,  нэр төртэй ажиллаж байгаа та бүхнээр бахархаж байна. Энэхүү хүлээж авсан тусгай зориулалтын автомашин, техникээ зориулалтын дагуу  зохих  ёсоор  ашиглаж гамшиг, осол, хор уршгийг шуурхай арилган  эрдэнэт хүмүүний  амь биеийг авран хамгаалж  ажиллана гэдэгт итгэж байна” хэллээ.