Монгол Улсын эдийн засаг, нийгмийн хөгжилд уул уурхайн салбарын хөрөнгө оруулалт чухал нөлөө үзүүлнэ. Энэ салбарт гадаад, дотоодын аж ахуйн нэгжүүд хөрөнгө оруулалт хийхийн хэрээр ажлын байр нэмэгдэнэ. Энэ хүрээнд гарч болох үл ойлголцол, гомдол санал, зөрчил маргааныг шийдвэрлэх механизм бий болгоход энэхүү гурван талт санамж бичиг чухал үүрэгтэйг Засгийн газрын Хэрэг эрхлэх газрын дарга Ч.Хүрэлбаатар онцоллоо.
Мөн байгалийн баялаг ашиглахтай холбоотой асуудлаар гарч болох маргааныг шийдвэрлэж буй олон улсын туршлагыг судлах, энэ талаарх мэдээлэлд тулгуурлан монгол орныхоо онцлогт нийцүүлсэн маргаан шийдвэрлэх арга зам, загварын санал боловсруулах, шаардлагатай тооцоо судалгааг хийнэ гэж тэрбээр хэллээ.
Монгол Улсын Засгийн газрыг төлөөлж, Монгол Улсын сайд, Засгийн газрын Хэрэг эрхлэх газрын дарга Ч.Хүрэлбаатар, Иргэний нийгмийг төлөөлж Монголын Үйлдвэрчний эвлэлийн холбооны ерөнхийлөгч С.Ганбаатар, Байгалийн баялаг ашиглах чиглэлийн бизнес эрхлэгчдийг төлөөлж, Монголын ажил олгогч эздийн нэгдсэн холбооны гүйцэтгэх захирал Х.Ганбаатар нар гурван талт санамж бичигт өнөөдөр гарын үсэг зурлаа гэж Засгийн газрын Хэвлэл мэдээллийн албанаас мэдээллээ.
