Монгол Улсын Ерөнхийлөгч Ц.Элбэгдорж, УИХ-ын дарга Д.Дэмбэрэл, Монгол Улсын Ерөнхий сайд С.Батболд нар гадаад орнуудаас манай улсад суугаа дипломат корпусын болон олон улсын байгууллагын удирдлагуудыг 2010 оны 12 дугаар сарын 21-ний өдөр хүлээн авч уулзан удахгүй болох шинэ жилийн баярын мэнд хүргэж ажлын амжилт хүсэв. Монгол Улсын Ерөнхийлөгч Ц.Элбэгдорж хэлэхдээ төр, засгийн тэргүүн нар гадаадын орнуудад айлчилж, өндөр дээд хэмжээний төлөөлөгчдийг эх орондоо хүлээн авсан нь манай орнуудын найрсаг харилцаа, хамтын ажиллагааг бататган бэхжүүлэхэд чухал ач холбогдолтой байсныг тэмдэглэв.
Манай улс Европын Холбоотой Түншлэл, хамтын ажиллагааны хэлэлцээрийг үзэглэснээр Монгол Улс, Европын харилцаа шинэ түвшинд гарч, хамтын ажиллагааны хүрээ өргөжин, Европын Холбооны стандарт, хэм хэмжээг Монгол Улсад нэвтрүүлэх ажлыг эхлүүлээд байгааг тэрээр онцлов. Мөн уур амьсгалын өөрчлөлтийн улмаас эрчимтэй цөлжиж байгаа Өмнөговь аймгийн Баяндалай сумын Гашууны хоолойд Монгол Улсын Засгийн газар энэ оны 8 дугаар сард тусгай хуралдаан хийж, дэлхийн хамтын нийгэмлэгт хандан илгээлт гаргасан нь энэ асуудалд өөрийн орны болон бусдын анхаарлыг чиглүүлэхэд үр дүнгээ өгнө хэмээн итгэж байна гэлээ.
Дипломат корпусын ахлагч, ХБНГУ-аас манай улсад суух Онц бөгөөд Бүрэн эрхт Элчин сайд Пиус Фишер бусдыгаа төлөөлөн хариу талархал илэрхийлж үг хэлэв. 2010 оныг Монгол Улсын Засгийн газраас “Бизнесийн орчны шинэтгэлийн жил” болгон зарласан Ерөнхий сайдын санаачилгыг ялангуяа бизнесийн төлөөлөл сайшаан хүлээн авсныг онцлоод байгаль орчноо хамгаалах, уул уурхайн салбарт хөрөнгө оруулахад тогтвортой, сөрөг үр дагавраас урьдчилан сэргийлсэн эрх зүйн орчин бүрдүүлэх гэсэн хоёр асуудлыг тэнцвэртэйгээр шийдэх Монгол Улсын Ерөнхийлөгч болон Засгийн газрын хүчин чармайлтад амжилт хүслээ.
Монгол Улсын эдийн засгийн өсөлт энэ жил 8 хувьд хүрч, Олон улсын валютын сангийн “Стэнд бай” хөтөлбөрийг амжилттай хэрэгжүүлсэн, ашигт малтмалын олборлолт, хөдөө аж ахуйн салбарт томоохон ахиц дэвшил гарч, өргөн хэрэглээний гол бүтээгдэхүүний хэрэгцээг дотоодоосоо бүрэн хангах зорилт улам бүр ойртож байгааг тэрээр хэлэв. Ерөнхий сайд С.Батболдын ОХУ-д хийсэн айлчлал, Монгол Улс, Европын Холбооны хооронд өчигдөр үзэглэсэн Түншлэл, хамтын ажиллагааны хэлэлцээр зэрэг нь гадаад бодлогоо идэвхтэй өрнүүлж байгааг харуулсны жишээ. Монгол Улс нь олон улсын нийгэмлэгт өндөр үнэлэгддэг гишүүн орон гэдгийг Пиус Фишер тэмдэглэв. Манай улсад гадаадын дипломат корпусын 19, олон улсын 9 байгууллага үйл ажиллагаа явуулдаг юм гэж Засгийн газрын Хэвлэл, мэдээллийн албанаас мэдээллээ.
