Монгол Улсын Засгийн газрын Хэрэг эрхлэх газар, ХБНГУ-ын Конрад Аденауэрийн сантай цаашид хамтран ажиллана. 2007 онд байгуулсан Хамтын ажиллагааны гэрээг дахин сунгах тухай Санамж бичигт талууд 2010 оны 10 дугаар сарын 19-ний өдөр гарын үсэг зурсан байна. Гэрээний дагуу олон нутгийн бие даасан байдлыг бэхжүүлэх, төвлөрлийг сааруулах, нутгийн захиргааны албан хаагчдын мэдлэг, боловсролыг дээшлүүлэх зэрэг чиглэлээр хамтран ажиллах юм.
Талууд энэ онд Сүхбаатар, Хэнтий, Дорнод, Баянхонгор, Говь-Алтай, Өмнөговь, Дундговь аймгийн сумдын Иргэдийн төлөөлөгчдийн хурлын Тэргүүлэгчдийн нарийн бичгийн дарга, Тамгын газрын дарга нарыг сургалтад хамруулсан бөгөөд ирэх жил бусад аймагт сургалтаа үргэжлүүлнэ.
Конрад Аденауэрийн сан нь манай улсад эрх зүйт төрийг хөгжүүлэх, төрийн албан хаагчдыг сургах, ардчиллын тухай ойлголтыг иргэдэд түгээж иргэний ардчилсан нийгэм байгуулахад туслах зорилгоор 1993 оноос үйл ажиллагаа явуулж эхэлсэн юм.
