“Хүрсэн үр дүнгээ бататгах, илүү олон асуудлыг шийдвэрлэх том зорилт та бүхний өмнө байна” гэж Монгол Улсын Ерөнхий сайд С.Батболд Нийслэлийн удирдлагуудад шагнал гардуулахдаа хэллээ. Нийслэлийн Засаг дарга, Засаг даргын Тамгын газрыг Засгийн газраас 10 сая төгрөгөөр шагнасныг Ерөнхий сайд С.Батболд нийслэлийн удирдах ажилтнуудын шуурхай зөвлөлгөөний үеэр гардуулсан юм. Тэрбээр шагнал гардуулахдаа “Та бүхэн өнгөрөгч 2009 онд иргэдийн нүдэнд харагдахуйц зарим асуудлууд тухайлбал, төв замын засвар, автобусны парк шинэчлэлт зэрэг олон асуудлыг шийдвэрлэсэн. Нийслэл хот өнөөдөр манай орны эдийн засаг, нийгмийн амьдралд шийдвэрлэх үүрэг гүйцэтгэж, дотоодын нийт бүтээгдэхүүний 50 гаруй хувийг үйлдвэрлэж байна.
Үндэсний хөгжил, шинэтгэлийн хорооноос гаргасан аймаг нийслэлийн хөгжлийг 9 бүлэг, 65 үзүүлэлтээр тооцсон хөгжлийн индексээр нийслэл маань Орхон, Өмнөговь аймгийн дараа гуравдугаарт орж байна. Энэ мэтчилэн олсон ололт, хүрсэн амжилт олон байгаа” гээд хүрсэн үр дүнгээ бататгаж ажиллахыг онцоллоо. Мөн хуулиар өгөгдсөн нийслэлийн эдийн засаг, нийгмийн хөгжлийн бодлогыг төлөвлөж, боловсруулах, хэрэгжилтийг шуурхай, оновчтой зохион байгуулах, тэдгээрийн хэрэгжилтийн явц, үр дүнд хяналт шинжилгээ, үнэлгээ хийх Засаг даргын Тамгын газрын үндсэн чиг үүргээ илүү сайн хийж хэвшүүлэх нь чухал.
Нийслэлийн өмнө тулгарч буй шийдлээ хүлээсэн олон асуудлыг иргэд олон түмний оролцоотойгоор дэс дараатай шийдвэрлэх, нутгийн захиргааны байгууллага, ажилтан бүрийн үйл ажиллагааны ил тод байдлыг хангах, иргэдэд төрийн үйлчилгээг хөнгөн шуурхай чирэгдэлгүй хүргэхэд онцгой анхаарах хэрэгтэй гэдгийг Монгол Улсын Ерөнхий сайд С.Батболд нийслэлийн харьяа байгууллагуудын удирдлагуудад анхаарууллаа. Монгол Улсын Засгийн газрын 2010 оны 11 дүгээр тогтоолоор баталсан журмыг үндэслэн 2009 оны үйл ажиллагааны үнэлгээгээр өндөр үнэлгээ авсан Сэлэнгэ, Дархан-Уул, Төв, Хэнтий аймаг, нийслэлийн Засаг даргын Тамгын газрыг тус бүр 10 сая төгрөгөөр шагнаж, дээрх аймаг, нийслэлийн Засаг даргын Тамгын газрын дарга нарт тус бүрт нь нэг сарын үндсэн цалинтай тэнцэх мөнгөн урамшуулал олгохоор шийдвэрлэсэн юм.
Аймаг, нийслэлийн Засаг дарга, Тамгын газрын үйл ажиллагааг бодлогын зорилтын хэрэгжилт, тэдгээрийн зохицуулалт, байгууллагын үйл ажиллагааны үр дүн, ил тод байдал, үр дагавар гэсэн таван үндсэн үзүүлэлтээр дүгнэсэн байна гэж Засгийн газрын Hэвлэл мэдээлллийн албанаас мэдээллээ.
