Тусламжийн цувааг үдэх ёслолд УИХ-ын дарга Д.Дэмбэрэл, Монгол Улсын Ерөнхий сайд С.Батболд, УИХ, Засгийн газрын гишүүд, нийслэлийн удирдлага, иргэд, төрийн болон төрийн бус байгууллага, Улаанбаатар дахь аймгуудын нутгийн зөвлөлийн төлөөлөл оролцов. Цас зудын хүндрэлтэй байгаа аймгуудын Улаанбаатар дахь нутгийн зөвлөл ихээхэн идэвх гаргаснаас Архангай, Баянхонгор, Дундговь, Говь-Алтай, Өмнөговь, Өвөрхангай, Төв, Завхан аймгийнхан онцгой анхаарсан байна.

Малчдад мөнгөн болон эд материалын дэмжлэг, туслалцаа үзүүлсэн хөрш хоёр орны Засгийн газар, дотоод, гадаадын иргэд, төрийн болон төрийн бус байгууллага, нутгийн зөвлөлүүд, аж ахуйн нэгжүүд, олон улсын хүмүүнлэгийн байгууллагуудад Ерөнхий сайд талархал илэрхийлэв. “Хандив, тусламжийн барааг тухайн аймаг, орон нутгийн удирдлага сум, багтаа хурдан шуурхай хүргэх ёстой. Үүнд УИХ, Засгийн газрын гишүүд, аймгуудын Улаанбаатар дахь нутгийн зөвлөлийн удирдлага анхаарч биечлэн оролцох болно.

Цаг агаарын хүнд, хэцүү нөхцөлд малчин түмэндээ тусламжийн бараа хүргэх хариуцлагатай бөгөөд нэр хүндтэй ажилд оролцож буй жолооч, тээвэрчдэд амжилт хүсье. Цаг зуурын бэрхшээлийг бид хамтдаа даван туулах болно” гэж тэрбээр хэллээ.Тодруулга. 2010 оны 2 дугаар сарын 1-ний байдлаар манай улсын нийт нутгийн 90 гаруй хувь нь цасан бүрхүүлтэй. 7 аймгийн 37 сум гамшгийн, 14 аймгийн 100 гаруй сум зудын байдалтай байна. Улсын хэмжээнд 1 сая 712 мянган мал хорогдоод байгаа бөгөөд зарим сум нийт малынхаа 60 хувийг алдсан мэдээтэй байна.

Өнгөрсөн хугацаанд Засгийн газар мал өвөлжилттэй холбоотой төрөл бүрийн арга хэмжээнд 2 тэрбум 207 сая 900 мянган төгрөг зарцуулсан. Мөн өвөлжилт хүндэрсэн 12 аймаг тус бүрд нь 230 сая төгрөгийн санхүүжилт өгөх  асуудлыг Засгийн газраас УИХ-д өргөн барьсан юм. Орон даяар өрнөж байгаа хандивын аяны дүнд ОБЕГ-ын дансанд 580 гаруй сая төгрөг цугларч, 50 орчим сая төгрөгийн бараа материалын хандив төвлөрөөд байна гэж Засгийн газрын Хэвлэл, мэдээллийн албанаас мэдээллээ.