Хүнс болон хөнгөн үйлдвэрийн мэргэжлийн холбоодын удирдлагуудтай уулзаж санал бодлыг нь сонссон Ерөнхий сайд С.Батболд өнөөдөр үдээс хойших цагаа Иргэний нийгмийн төлөөлөлд зарцууллаа. Эдүгээ манай улсад 12600 төрийн бус байгууллага байдаг бөгөөд эдгээрээс 170 гаруй нь идэвхтэй үйл ажиллагаа явуулдаг ажээ. Тэдний төлөөллийг Ерөнхий сайд ярилцлагад урьсан нь энэ юм. Нийгмийн толь болсон олон асуудлыг ямар нэг захиалгаар биш өөрсдийн сэтгэл зүрхээрээ хийдэг тэднээс чин үнэн үг гарч байсан бөгөөд тийм ч болохоор Засгийн газрын тэргүүн тэдэнд цагаа харамласангүй.
Ерөнхий сайд эхлээд тэдэнд тодорхой саналуудыг тавилаа. Тухайлбал Иргэний нийгмийн зарчим, хэв шинж, хэлбэр бүтэц, Засгийн газраас баримтлах стратегийг тусгасан “Иргэний нийгмийн тогтвортой хөгжлийг хангах төрийн бодлого”–ын үзэл баримтлалыг боловсруулах хоёр талын ажлын хэсгийг байгуулах, санхүүжилтийг шийдвэрлэх арга замыг тэдэнд дуулгалаа. Энэ бодлогын хүрээнд Олон Улсын байгууллагуудын оролцоотойгоор Иргэний нийгмийн байгууллагуудын индексийг боловсруулах, суурь судалгаа хийлгүүлэх,Сайн засаглалыг бий болгоход иргэний нийгмийн үүрэг оролцоог хангах талаар тодорхой бодлого, хөтөлбөр боловсруулах, Засаглалын ил тод нээлттэй байдлыг бий болгох талаарх санаачилгуудыг дэмжиж хэрэгжүүлнэ гэдгээ ч тэмдэглэлээ.
Тиймээс “Нээлттэй засаглалын тунхаг”-ийг Иргэний нийгмийн зөвлөлтэй хамтран гаргах саналтай байгаагаа онцлов. Түүнчлэн нэг хувийн татварын асуудлыг бас хөндлөө. “Татвар төлөгч иргэн Хүн амын орлогын албан татварынхаа 1 хувийг нийгэмд ач тустай үйл ажиллагаа явуулдаг аль нэг төрийн бус байгууллагад зориулан нэр зааж тодорхойлж өгөх” санаачилга байдаг. Ийм санаачилгыг Унгар, Словак, Литва, Польш, Румын улс татварын хуульдаа өөрчлөлт хийх замаар хэрэгжүүлж байна.
Үүнийг хамтдаа судалж, хэрэгжүүлэхийн төлөө ажиллацгаая хэмээх уриалгыг Иргэний нийгмийн төлөөлөлийнхөн баяртайгаар хүлээн авлаа. Энэ уулзалт үр дүнгүй, хэлбэр төдий болох юм биш биз гэсэн тэдний хатуухан асуултад Ерөнхий сайд С.Батболд “ Би ажлаа авсны дараа Засгийн газрын зарим чиг үүргийг мэргэжлийн холбоодод хариуцуулах саналыг дэвшүүлж байгаа. Энэ хүрээнд ч өнөөдөр та бүхнийг урьсан. Тиймээс бүгдээрээ асуудлыг хамтран ярилцаж нэг алхам урагшилсан, нээлт хийсэн уулзалт хэмээн ойлгоорой” гэх хариултад урам орсон Иргэний нийгмийн төлөөлөл учирч буй асуудлуудаа ч нэг бүрчлэн ярилаа.
Засгийн газрын хуралдаанд төрийн бус байгууллагын төлөөлөлийг оруулж болох уу, бас гадаад айлчлалд төлөөлөл баймаар байна. МҮОНТ-д иргэний нийгмийн цаг гаргаж өгөх, Засгийн газарт иргэний нийгмийхэнтэй харьцах төлөөллийг бий болгоё, ИТХ-ыг иргэний байгууллагад өгөх хэрэгтэй гэх саналууд нийтлэг хөндөгдөж, хамгийн гол нь иргэн хүн нийгмийн төлөө сайн дураараа яаж зүтгэх вэ гэдгийг нээлттэй болгож өгөх ёстойг дурьдаж байсан юм.
Салбар бүрийнхээ зовлонг тоочиж, цаг багагүй авсан тэдний саналыг сонссоны дараа Ерөнхий сайд цаашид ийм уулзалтыг танхимынхантайгаа хамтран зохион байгуулах боломжтойг тэмдэглэлээ. Хууль гарахаас өмнө Мэргэжлийн холбоод болон Иргэний нийгмийн байгууллагын төлөөллийг багтаасан ажлын хэсэг байгуулж, ажлын хэсгийн ахлагчаар Монгол улсын сайд ,ЗГХЭГ-ын дарга Ч.Хүрэлбаатарыг томиллоо. Үүний дараа хэлэлцүүлэг зохион байгуулж болохыг ч дуулгасан юм. Монгол улсын Засгийн газар Иргэний нийгмийн төлөөлөлтэй хамтарч ажиллахад бэлэн гэдгээ энэ үеэр онцоллоо гэж Засгийн газрын Хэвлэл мэдээллийн албанаас мэдээллээ
