ХБНГУ Монгол Улсыг ардчилал, зах зээлийн харилцаанд шилжсэн цагаас эхлэн тууштай дэмжиж ирснийг Ерөнхий сайд тэмдэглээд Түншлэл, хамтын ажиллагааны хэлэлцээ байгуулахад бэлэн болсон нь тус улсын дэмжлэгтэй салшгүй холбоотой гэлээ. Мөн Монгол Улсын Засгийн газар Европын стандарт, хэм хэмжээг нутагшуулахын тулд  шаардлагатай бүх арга хэмжээг авч хэрэгжүүлж байгааг ч дуулгав.  

ХБНГУ нь Монголтой харилцах харилцаандаа онцгой ач холбогдол өгдөг. Хоёр орны төр, засаг, тэдгээрийн харъяа байгууллагуудаас гадна Германд суралцагчдын нийгэмлэг хоёр улсын харилцаа, хамтын ажиллагааг хөгжүүлэхэд чухал үүрэг гүйцэтгэж байгааг ХБНГУ-ын Гадаад хэргийн яамны Төрийн нарийн бичгийн дарга Петер Аммон тэмдэглэлээ. ХБНГУ-д Монголыг сонирхох сонирхол эрс нэмэгдэж байгааг тэрээр хэлээд  томоохон төсөл, хөтөлбөр, бүтээн байгуулалтад хөрөнгө оруулж хамтран ажиллахыг зорьж байна гэв хэмээн Засгийн газрын Хэвлэл, мэдээллийн албанаас мэдээллээ.