2010 онд ургац хураалтаар улсын хэмжээнд 366,3 мянган тонн үр тариа, 169,0 мянган тонн төмс, 90,3 мянган тонн  хүнсний ногоо, 38,9 мянган тонн тэжээлийн ургамал хураан авч хэрэгцээт буудай, төмсийг 100 хувь, хүнсний ногооны 53,7 хувийг дотоодын ургацаас хангах боломжийг бүрдүүлээд байгаа.

Монгол Улсын Засгийн газраас дэвшүүлсэн “Атрын гурав дахь аян”-ы хүрээнд  арвин ургац хураан авсан Сэлэнгэ аймгийн тариаланчид энэ сарын 04-нд ургацын баяраа тэмдэглэж, шилдгүүдээ шалгарууллаа. Тус арга хэмжээнд УИХ-ын гишүүн, Сангийн сайд С.Баярцогт, ХХААХҮ-ийн сайд Т.Бадамжунай нар оролцсон юм. 

Төрийн албан хаагчдыг орон сууцаар хангах “4000 айлын орон сууц” хөтөлбөрийг Засгийн газар хэрэгжүүлж байгаа билээ. Энэ хөтөлбөрийн хүрээнд баригдсан 12 айлын орон сууцыг Төв аймгийн Зуунмод хотноо ашиглалтад хүлээн авлаа. Аймгийн цагдаагийн ажилтнуудын нийгмийн асуудлыг шийдвэрлэх зорилгоор Цагдаагийн ерөнхий газар, Орон сууцны санхүүжилтийн корпораци хамтарч ажиллах гэрээ байгуулан, Засгийн газрын бондын хөрөнгөөр санхүүжүүлж орон сууц барихаар болсон юм. Энэ дагуу цагдаагийн албан хаагчид  20 жилийн хугацаатай, жилийн 8 хувийн хүүтэй хөнгөлөлттэй зээл авч, 42.4-43.6 сая төгрөгөөр 101.1-104 м/кв талбай бүхий, амины 2 давхар орон сууцтай болж байна.

 Барилгыг хүлээн авах ёслол 2010 оны 12 дугаар сарын 03-ны өдөр Зуунмод хотноо болж УИХ-ын гишүүн, Монгол Улсын Шадар сайд М.Энхболд, Төв аймгаас сонгогдсон УИХ-ын гишүүд, Орон сууцны санхүүжилтийн корпораци, барилгын ажлын гүйцэтгэгч “Цома” компани, орон нутгийн удирдлага, иргэдийн төлөөлөл оролцов.

Төв аймгийн Зуунмод хотын Зүүндэлгэр багийн “Ирээдүй” цэцэрлэгийн барилгыг газрын гүний дулаан ашиглан халаах туршилт хийсэн нь амжилттай боллоо. Хөрсөнд шингэсэн нарны цацраг дулааны энерги болон хувирч, тодорхой гүнд тогтмол  хадгалагддаг. Үүнийг насос ашиглан авч барилга, байшинг дулаанаар хангадаг технологийг  нутагшуулах зорилт ийнхүү бодит ажил болж байна.

Энэ аргыг Зүүндэлгэр багийн сургууль, аймгийн Нэгдсэн эмнэлгийн халдвартын больницын барилгад нэвтрүүлэх бөгөөд эхний ээлжинд “Ирээдүй” цэцэрлэгийн халаалтын системийг хүлээн авлаа. 60 хүүхэдтэй энэ цэцэрлэгийг дулаанаар хангахын тулд  100 метрийн гүн 24 цооног өрөмдөж дулаан дамжуулах хуванцар хоолой суулган, 90 кВт-ын чадалтай дулааны насос суурилуулсан байна.

Улсын Онцгой комисс 2010 оны 11 дүгээр сарын 25-ны өдөр хуралдаж Дорнод, Сүхбаатар аймагт гарсан мал, амьтны гоц халдварт шүлхий өвчний нөхцөл байдал, цаашид авах арга хэмжээний тухай хэлэлцэн ийм шийдвэр гаргалаа.Сүүлийн 14 хоногт Дорнод, Сүхбаатар аймагт өвчлөл гараагүй бөгөөд дээрх 2 аймгийн нийт малыг вакцинжуулж дууссан байна. Иймд дээрх нөхцөл байдлыг харгазлан үзээд Дорнод, Сүхбаатар аймагт тогтоосон гамшгаас хамгаалах өндөржүүлсэн бэлэн байдалд шилжүүлсэн хорио цээрийн дэглэмийг цуцах асуудлыг Засгийн газрын хуралдаанд оруулахаар боллоо.

Хуралдаанаас эцсийн ариутгал халдваргүйжүүлэлт, цэвэрлэгээг яаралтай хийх, мал устгасан газарт байнгын хяналт тавьж, анхаарлаа бууралахгүй ажиллахыг аймгийн Засаг дарга нарт даалгалаа. Өнөөдрийн хуралдаанаар Нийслэл хот орчимд байгаа өвчлөмтгий малын вакцинжуулалтын явцын талаар хэлэлцлээ. Өнөөдрийн байдлаар нийслэлийн хэмжээнд вакцинжуулалт 68 хувьтай байна.

• ЗАСГИЙН ГАЗРЫН ЯАМ, АГЕНТЛАГУУДААС ОЛГОГДОЖ БАЙГАА ЗӨВШӨӨРЛИЙН ЖАГСААЛТ
• ХҮЧИНГҮЙ БОЛГОХООР САНАЛ БОЛГОЖ БУЙ ЗӨВШӨӨРӨЛ
• Засгийн газрын хуралдааны тэмдэглэл
• Засгийн газрын яам, агентлагуудад хүргүүлсэн албан бичиг файл1, файл2 

          Бизнес эрхлэхэд хүндрэл, чирэгдэл учруулж байгаа зөвшөөрлийг хүчингүй болгох, хялбаршуулан сайжруулах талаархи иргэн, аж ахуйн нэгж, төрийн бус байгууллагын санал, хүсэлтийг 2010 оны 11 дүгээр сарын 30-ны дотор Монгол Улсын Засгийн газрын Ажлын хэсэгт гэсэн хаяг, эсвэл Энэ хаягийг спам-с хамгаалж байгаа бөгөөд та үзэхийн тулд JavaScript идэвхжүүлэх хэрэгтэй. хаягаар авна.

          Энэ нь Засгийн газраас 2010 оныг “Бизнесийн орчны шинэтгэлийн жил” болгон зарлаж, Аж ахуйн үйл ажиллагаа эрхлэх зөвшөөрөл, түүнийг олгохтой холбогдсон харилцааг зохицуулж байгаа хууль тогтоомж, эрх зүйн бусад актыг хянаж боловсронгуй болгоход чиглэгдэж байна.

         Аж ахуйн үйл ажиллагааны тусгай зөвшөөрлийн тухай хуульд заасан 42, бусад хуульд заасан 37, хуулиас бусад эрх зүйн актаар зохицуулсан 19, нийт 98 зөвшөөрлийг хүчингүй болгуулахаар, 15 зөвшөөрлийг гэрээний үндсэн дээр мэргэжлийн төрийн бус байгууллагаар гүйцэтгүүлэхээр шилжүүлэх нь зүйтэй гэж Монгол Улсын Шадар сайдаар ахлуулсан Ажлын хэсэг үзэж байгаа юм.

        Иргэн, аж ахуйн нэгж, төрийн бус байгууллагын санал, хүсэлтийг Ажлын хэсэг хүлээн авч судлан, хүчингүй болгох зөвшөөрөл, эрх зүйн актын жагсаалтыг гаргаж, 12 дугаар сарын 20-ны дотор Засгийн газрын хуралдаанд оруулж шийд гаргуулна. 

Монгол Улсын Шадар сайд, Улсын Онцгой комиссын дарга М.Энхболд 2010 оны 11 дүгээр сарын 10-ны өдөр Япон Улсаас Монгол Улсад суугаа Онц бөгөөд Бүрэн эрхт Элчин сайд Кидокоро Такүог хүлээн авч уулзав. Тэрээр мал, амьтны гоц халдварт шүлхий өвчний тархалт, Засгийн газраас авч хэрэгжүүлж байгаа ажлын талаар танилцуулан, энэ чиглэлээр Япон Улсаас тусламж, дэмжлэг авах хүсэлтэй байгаагаа илэрхийллээ.

Шүлхий өвчин, энэ өвчинтэй хэрхэн тэмцэх талаар хийсэн судалгааныхаа дүнг маргааш гэхэд Токиод илгээх бөгөөд ойрын үед албан ёсны, тодорхой хариу өгье гэж Онц бөгөөд Бүрэн эрхт Элчин сайд хэлэв хэмээн Засгийн газрын Хэвлэл, мэдээллийн албанаас мэдээллээ.