Манай улсад ажиллах хугацаа нь дуусч бүрмөсөн нутаг буцах болсонтой нь холбогдуулан Монгол Улсын Ерөнхий сайд С.Батболд 2010 оны 12 дугаар сарын 10-ны өдөр Азийн хөгжлийн банкны суурин төлөөлөгчийн газрын захирал Адриан Рутенбергийг хүлээн авч уулзав. Азийн хөгжлийн банк манай улсыг зах зээлийн харилцаанд шилжсэн цагаас эхлэн тууштай дэмжиж, олон төсөл, хөтөлбөрийг амжилттай хэрэгжүүлсэн. Үүнд  Суурин төлөөлөгчийн газрын захирлын оруулсан хувь нэмэр их гэдгийг Ерөнхий сайд уулзалтын эхэнд тэмдэглэлээ.

Засгийн газар Азийн хөгжлийн банктай хамтарч боловсрол, хөдөө аж ахуй, хүний хөгжлийн чиглэлээр хамтран ажиллаж үр дүнд хүрч байна. Эдийн засгийн өсөлтийг иргэддээ ашигтайгаар хүртээхийг зорьж байгаа энэ үед Азийн хөгжлийн банк, Дэлхийн банк зэрэг олон улсын санхүүгийн байгууллагатай хамтран ажиллах нь чухал байна гэж тэрээр хэлэв.

Манай улсад Хөгжлийн банкийг амжилттай байгуулах чиглэлээр БНСУ-ын Хөгжлийн банк хамтран ажиллахад бэлэн байна. Хөрөнгө, санхүүгийн зах зээлийг хөгжүүлэх, хөрөнгийн хуримтлал бий болгох, гадаадын хөрөнгө оруулалтыг хэрхэн татах зэрэг туршлагаасаа хуваалцаж, энэ салбарт ажиллах  мэргэжилтэн, боловсон хүчнийг бэлтгэх талаар хамтран ажиллах сонирхолтой байгаагаа Монгол Улсын Ерөнхий сайд С.Батболдод тус улсын Хөгжлийн банк санхүүгийн группын дарга бөгөөд гүйцэтгэх захирал И.С.Мин тэргүүтэй төлөөлөгчид 2010 оны 12 дугаар сарын 10-ны өдөр бараалхахдаа дуулгалаа.

 Монгол Улс уул уурхайн салбараа түшиглэн эдийн засгаа хөгжүүлэхийг чармайж байна. Их хөгжлийн загвараа зөв тодорхойлж, улмаар амжилтад хүрсэн улс орны нэг нь БНСУ. Манай Засгийн газар хөрөнгө, санхүүгийн зах зээлээ хөгжүүлэх, Хөгжлийн банк байгуулах, өрсөлдөх чадвартай болохоор зорьж байгаа энэ үед  БНСУ-ын Хөгжлийн  банкны туршлага сонирхол татаж байна. Цаашид  хамтран ажиллах чиглэлээр бэлтгэж, сонгон шалгаруулалтад оролцохыг зөвлөе гэж Ерөнхий сайд С.Батболд хэлэв.

 БНСУ-ын Хөгжлийн банк 1954 онд байгуулагдсан. 1960-1970 онд дэд бүтцийн, 1970-аад оноос аж үйлдвэрийн салбарт хөрөнгө оруулж байсан бол сүүлийн жилүүдэд өндөр технологи, гадаадад хөрөнгө оруулах чиглэлээр түлхүү анхаарч байна гэж Засгийн газрын Хэвлэл, мэдээллийн албанаас мэдээллээ.

Хөрөнгө оруулалт, үйлдвэрлэл худалдаа, аялал жуулчлал  хөгжихийн хэрээр даяаршлын  их давалгаан дунд Монголчуудын үнэт зүйл, нийгмийн баялаг болох үндэсний өв соёл, ёс заншил, түүх дурсгалаа дээдлэн хадгалж, уламжлал шинэчлэлийг зөв зохистой хослуулсан хөгжлийн зөв гарц хэрэгтэй байгаа талаар УИХ-ын гишүүн, Монгол Улсын Шадар сайд М.Энхболд өнөөдөр залуу эрдэмтэдтэй уулзахдаа хэллээ.

Мөн манай орны онцлогт тохирч, монгол хөрсөнд нутагшсан, монгол хүний оюун ухаан, эрдэм мэдлэг, мэргэжлийн ур чадвар, идэвхи зүтгэл, үндэсний бахархал, эх оронч үзэл, итгэл үнэмшилд суурилсан нийгмийн чиг баримжаа бүхий хөгжлийн шинэ технологи ус агаар мэт хэрэгтэй байна гэж Төв аймагт болсон “Төв нутгийн хөгжил-эрдэм судлал” хурлыг нээж хэлэхдээ тэрбээр онцоллоо.