Монгол Улсын Ерөнхий сайд С.Батболд Олон улсын атомын энергийн агентлагийн ерөнхий захирал Юкия Аманог хүлээн авч уулзлаа.
Манай улс тус агентлагтай хамтран ажиллах хөтөлбөрт өнгөрсөн оны 12 дугаар сард гарын үсэг зурсан. Хөтөлбөрийн хүрээнд атомын энерги, эрүүл мэнд, хөдөө аж ахуй, уул уурхайн салбарт төслүүд хэрэгжүүлэхээр төлөвлөсөн. Төслийг хэрэгжүүлэхэд Засгийн газар тусгайлан анхаарч байгаа гэдгээ Ерөнхий сайд уулзалтын эхэнд тэмдэглэлээ.
Мөн Олон улсын атомын энергийн агентлаг хорт хавдрыг эмчлэх үйл ажиллагааны хөтөлбөрийн хэрэгжилтын загвар орноор Монголыг сонгосонд талархаж байгаагаа Засгийн газрын тэргүүн илэрхийлээд ирэх 4-5 жилд энэхүү чухал зорилтыг хэрэгжүүлнэ гэдэгт итгэлтэй байгаагаа хэллээ.Уулзалтын үеэр малын гоц халдварт шүлхийн вакцин болоод уг өвчнөөс урьдчилан сэргийлэх асуудал мөн хөндөгдлөө.
Манай улсад шүлхийн вакцин нийлүүлэх, уг өвчнийг оношлох лаборатори байгуулахад туслалцаа үзүүлэхийг Олон улсын атомын энергийн агентлагаас Ерөнхий сайд хүссэн юм.Ноён Юкия Амано Монгол Улс Олон улсын атомын энергийн агентлаг хоорондын хамтын ажиллагаа амжилттай хөгжиж байгаад талархал илэрхийлээд малын гоц халдварт шүлхий өвчинтэй тэмцэх, түүнээс урьдчилан сэргийлэхэд анхаарна. Лаборатори байгуулахад техникийн тусламж үзүүлэх боломжтой гэдгээ уулзалтын үеэр онцоллоо.
Атомын станц байгуулахад техник эдийн засгийн үндэслэл боловсруулах шинжээчдийн баг ирүүлэхээ тэрбээр мэдэгдлээ. Мөн цөмийн энергийн салбарыг хөгжүүлэхэд эрх зүйн орчинг боловсронгуй болгох нь чухал гээд Монгол Улс нь энэ асуудлаарх олон талт гэрээнд нэгдэхийг ноён Юкия Амано уриаллаа. Тэрбээр хорт хавдартай тэмцэх үзүүлэлтээр Монгол Улс Азидаа үлгэр болж байгааг онцлоод амжилт хүслээ гэж Засгийн газрын Хэвлэл мэдээллийн албанаас мэдээллээ.
