Үүнд:
-2010 оны худалдан авах ажиллагааны төлөвлөгөөг төсөл, арга хэмжээ бүрээр энэ оны 12 дугаар сард багтаан баталж 2010 оны 2 дугаар сарын 1-ний дотор улсын хэмжээнд бүх тендер зарлагдаж, 4 дүгээр сарын 1-ний дотор тендер шалгаруулалтыг дүгнэж дуусган гүйцэтгэгчтэй гэрээ байгуулж ажлыг нь эхлүүлсэн байх;
-тендер шалгаруулалтын онцгой журам болох харьцуулалтын болон гэрээ шууд байгуулах аргыг хэрэглэхдээ хууль зөрчихгүй байх, Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 8.1.1 дэх хэсэгт заасан босго үнээс өндөр төсөвт өртөгтэй аливаа худалдан авах ажиллагааг нээлттэй тендер шалгаруулалтын журмаар зохион байгуулах;
-тендерийн урилга, үр дүнг Засгийн газрын худалдан авах ажиллагааны цахим сүлжээнд /www.e-procurement.mn/ цаг хугацаанд нь бүрэн гүйцэд, үнэн зөв тавьж, гүйцэтгэгчийг сонгон шалгаруулсан үндэслэлийг нээлттэй, ил тод мэдээлж байх;
-захиалагч бүр Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 46 дугаар зүйлд заасан захиалагчийн эрх, үүргийг бүрэн хэрэгжүүлж ажиллах;
-2010 оны хөрөнгө оруулалтын төсөл, арга хэмжээний худалдан авах ажиллагааг хугацаанд нь зохион байгуулж, ажлыг нь эхлүүлэх хүртэл хугацаанд яам, агентлаг, аймаг, нийслэлийн төсвийн ерөнхий менежерийг гадаадад томилолтоор явуулахгүй байх;
-Монгол Улсын 2010 оны төсвийн тухай хуулиар батлагдсан урсгал төсвийн болон хөрөнгө оруулалтын төсөл, арга хэмжээний худалдан авах ажиллагааны явцын талаархи дүнг улирал бүрийн дараа сарын 15-ны дотор Сангийн яаманд хүргүүлж байхыг даалгалаа гэж Засгийн газрын хэвлэл, мэдээллийн албанаас мэдээллээ.