Монгол Улсын Засгийн газраас 2011 оныг “Хөдөлмөр эрхлэлтийг дэмжих жил” болгон зарласны дагуу Нийслэлийн Иргэдийн хурал болон нийслэлийн төр захиргааны байгууллагаас “Хөдөлмөр эрхлэлт-Хүний хөгжлийг дэмжих жил”-ээр зарлан ажиллаж байгаа. Зорилтод жилийн хүрээнд нийслэлийн хэмжээнд хөдөлмөр эрхлэлтийг нэмэгдүүлэх талаар хийгдэж байгаа ажил бодит хөрсөн дээр бууж, ард иргэдэд хүрч байгаа эсэхийг очиж үзэх нь Засгийн газрын тэргүүний амралтын нэг өдрийн ажлын гол зорилго болж байна. Тэрбээр энэ өдөр нийслэлийн Сүхбаатар, Чингэлтэй дүүрэгт ажиллах юм. Монгол Улсын Ерөнхий сайд С.Батболдыг нийслэлд ажиллахад Нийслэлийн Иргэдийн төлөөлөгчдийн хурлын дарга Т.Билэгт, Улаанбаатар хотын Ерөнхий менежер Ч.Бат нар дагалдана гэж Засгийн газрын Хэвлэл мэдээллийн албанаас мэдээллээ.