Монгол Улсын Ерөнхий сайд С.Батболд Монголын Ардчилсан социалист залуучуудын холбооны санаачлагаар Олон улсын хүүхдийн найрамдал төвд  зохиогдож буй “Нийгмийн ардчиллын төлөө” залуучуудын чуулга уулзалтад 2009 оны 12 дугаар сарын 12-нд оролцлоо. Чуулга уулзалтад 21 аймаг, 9 дүүргээс сонгогдсон 200 гаруй төлөөлөгч оролцож нийгмийн ардчиллыг тодорхойлох хариуцлагатай, боловсролтой, эрүүл, бүтээлч, эх оронч монгол залуу гэсэн 5 сэдвийн хүрээнд хамтдаа чуулж байгаа юм байна.

Төлөөлөгчид монголын залуучуудын өмнө тулгамдаж буй асуудлуудыг тодорхойлж залуучуудын анхаарлыг хандуулах, шийдвэрлэх гарцыг хамтдаа эрэлхийлэх, залуусын нийгмийн оролцоог нэмэгдүүлэх, залуучуудын талаар төр, засгийн түвшинд  юу хийх хэрэгтэй байгаа талаар хэлэлцэж санал бодлоо солилцлоо.  

Ерөнхий сайд С.Батболд хэлсэн үгэндээ “…Бид ардчилсан Монгол улсдаа амьдарч байна. Ардчилал хэр бат бөх байхаас улс орны хөгжлийн ирээдүй тодорхойлогдоно. Залуу хүн бүр үүргээ ухамсарлаж өөрийн эрхэлсэн ажилдаа эзэн байж чадвал Монголын ардчилал бэхжих бас нэгэн үндэс болно. Өөрөөр хэлбэл залуусыг хэр ухаалаг хүлээцтэй, хариуцлагатай, бүтээлч, боловсролтой, эх оронч иргэн болж төлөвшихөөс Монголын ирээдүй шалтгаална.

Залуучууд та бүхэн даяаршсан дэлхий ертөнцийн жинхэнэ иргэн нь болж Монгол улсын өрсөлдөх чадварыг тодорхойлогч хүчин нь байх ёстой. Энэхүү чуулга уулзалт нь нийгмийн ардчиллыг шинэ шатанд гаргах үйлсийн эхлэл, Монголын залуучуудад ардчиллын үнэ цэнэ, мөн чанарыг таниулах оюун санааны чуулга байгаасай гэж хүсч байна.…” гэлээ.